(ទីស្តីការក្រសួងពាណិជ្ជកម្ម) នៅរសៀលថ្ងៃទី២២ ខែវិច្ឆិកា ឆ្នាំ២០២៤ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានអញ្ជើញចូលរួមជាអធិបតីបិទកម្មវិធីការចុះសិក្សាគម្រោងស្តីពី “មជ្ឈមណ្ឌលគ្រប់គ្រងម៉ាកពាណិជ្ជកម្មជាតិរបស់កម្ពុជា និងការអភិវឌ្ឍប្រព័ន្ធព័ត៌មានអាជីវកម្មកម្មសិទ្ធិបញ្ញា” (Cambodia’s National Trademark Management Center and IP-Business Information System Development Project-NTMC) របស់ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដោយមានការអញ្ជើញចូលរួមពីសំណាក់ លោកស្រី CHOI Moon Jung នាយិកា KOICA ប្រចាំប្រទេសកម្ពុជា ឯកឧត្តម សួន វិជ្ជា ទីប្រឹក្សាក្រសួង និងជាប្រធាននាយកដ្ឋានកម្មសិទ្ធិបញ្ញា ជំនាញការកូរ៉េ រួមទាំងមន្ត្រីរបស់នាយកដ្ឋានកម្មសិទ្ធិបញ្ញា។

ជាកិច្ចចាប់ផ្តើម លោកស្រី CHOI Moon Jung បានថ្លែងអំណរគុណជូនចំពោះក្រសួងពាណិជ្ជកម្ម ជាពិសេសនាយកដ្ឋានកម្មសិទ្ធិបញ្ញា និងនាយកដ្ឋានពាក់ព័ន្ធ ដែលបានផ្តល់កិច្ចសហការ និងសម្របសម្រួលដល់ជំនាញការរបស់ KOICA ក្នុងការចុះសិក្សាលើគម្រោងខាងលើ និងការជួបប្រជុំពិភាក្សារវាងជំនាញការកូរ៉េជាមួយក្រសួងស្ថាប័នពាក់ព័ន្ធ សមាគមកម្មសិទ្ធិបញ្ញាកម្ពុជា ក៏ដូចជាភ្នាក់ងារស្របច្បាប់តំណាងម្ចាស់ម៉ាកផងដែរ។ លោកស្រីបានបន្ថែមទៀតថាក្រោយពីបញ្ចប់ការសិក្សាបឋមនេះ ជំនាញការកូរ៉េនឹងរៀបចំរបាយការណ៍លទ្ធផលនៃការសិក្សា ដើម្បីដាក់បញ្ជូនទៅទីភ្នាក់ងារសហប្រតិបត្តិការកូរ៉េស្នាក់ការកណ្តាល ដើម្បីបន្តនីតិវិធីដាក់ឆ្លងគណៈកម្មាការត្រួតពិនិត្យឯកសាររបស់KOICA នៅប្រទេសកូរ៉េ។ លោកស្រីសង្កត់ធ្ងន់ថា គម្រោងនេះជួយកម្ពុជាក្នុងការពង្រឹងប្រព័ន្ធសេវាឌីជីថលចុះបញ្ជីម៉ាក និងការកសាងកេរ្តិ៍ឈ្មោះម៉ាកសម្រាប់កម្ពុជា ការលើកកម្ពស់ការចុះបញ្ជីម៉ាក ម៉ាកសម្គាល់ភូមិសាស្ត្រទំនិញកម្ពុជា និងពង្រឹងកិច្ចការពារកម្មសិទ្ធិបញ្ញានៅកម្ពុជា។

ឆ្លៀតក្នុងឱកាសនេះដែរ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានថ្លែងអំណរគុណជូន ចំពោះលោកស្រី CHOI Moon Jung តំណាង KOICA នៅកម្ពុជា ដែលតែងតែគាំទ្រនិងផ្តល់ជំនួយបច្ចេកទេសដល់កម្ពុជា ជំនាញការកូរ៉េ និងមន្ត្រីជំនាញនៃនាយកដ្ឋានកម្មសិទ្ធិបញ្ញា ដែលបានចំណាយពេលវេលាដ៏មានតម្លៃក្នុងការរួមគ្នាពិភាក្សានិងគាំទ្រដល់ការចុះធ្វើការសិក្សាលើគម្រោងខាងលើនេះ ចាប់ពីថ្ងៃទី១៨ ដល់ ២២ នេះដោយជោគជ័យ។ ឯកឧត្តមរដ្ឋលេខាធិការគូសបញ្ជាក់ថា រាជរដ្ឋាភិបាលកម្ពុជា ជាពិសេស ក្រសួងពាណិជ្ជកម្ម យកចិត្តទុកដាក់ក្នុងការធ្វើទំនើបកម្មប្រព័ន្ធឌីជីថលនានាដើម្បីឆ្លើយតបទៅនឹងការផ្តល់សេវាសាធារណៈរបស់ក្រសួងពាណិជ្ជកម្មជូនសាធារណជន ដើម្បីធានាថាការផ្តល់សេវាមានភាពរហ័ស ចំណាយពេលវេលាតិច កាត់បន្ថយចំណាយ និងមានតម្លាភាព។

ឯកឧត្តម សួន វិជ្ជា បានលើកឡើងថា គម្រោងនេះ ពិតជាមានសារៈសំខាន់ណាស់សម្រាប់កម្ពុជាក្នុងការលើកកម្ពស់កិច្ចការពារការចុះបញ្ជីម៉ាក ការកសាងកេរ្តិ៍ឈ្មោះម៉ាក និងបង្កើតប្រព័ន្ធទិន្នន័យកម្មសិទ្ធិបញ្ញាជាឧបករណ៍វិភាគធុរកិច្ចដើម្បីលើកកម្ពស់ពាណិជ្ជកម្ម និងវិនិយោគ។