(ភ្នំពេញ)៖នៅព្រឹកថ្ងៃសុក្រ ទី៧ ខែមីនា ឆ្នាំ២០២៥ ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម ប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញា និងសហការី បានអញ្ជើញចូលរួមកិច្ចប្រជុំពិភាក្សាការងារជាមួយ លោកស្រី Ha-Young Yoon ប្រតិភូនៃសមាគមលើកកម្ពស់នវានុវត្តន៍កូរ៉េ (KIPA) និងក្រុមការងាររបស់ ក្រសួងអប់រំ យុវជន និងកីទ្បា ក្រោមការដឹកនាំរបស់លោកជំទាវ គឹម សេដ្ឋានី រដ្ឋលេខាធិការប្រចាំការរបស់ក្រសួងអប់រំ យុវជន និងកីទ្បា នៅទីស្តីការក្រសួងអប់រំ យុវជន និងកីទ្បា។

គោលបំណងនៃកិច្ចប្រជុំនេះគឺដើម្បីពិភាក្សាលើគម្រោង NICE ដែលរដ្ឋាភិបាលនៃសាធារណរដ្ឋកូរ៉េ បានផ្តល់ការអនុម័តគម្រោងជូន ក្រសួងអប់រំ យុវជន និងកីឡា ក្រោមកិច្ចសម្របសម្រួលនៃនាយកដ្ឋានកម្មសិទ្ធិបញ្ញានៃអគ្គនាយកដ្ឋានសេវាពាណិជ្ជកម្ម នៃក្រសួងពាណិជ្ជកម្ម។ គម្រោងខាងលើនេះ នឹងត្រូវចូលរួមអនុវត្តរួមគ្នាដោយ ក្រសួងអប់រំ យុវជន និងកីឡា នាយកដ្ឋានកម្មសិទ្ធិបញ្ញា និង KIPA ពាក់ព័ន្ធនឹងការកសាងកម្មវិធីសិក្សាសម្រាប់សិស្សវិទ្យាល័យពាក់ព័ន្ធនឹងចំណេះដឹងផ្នែកកម្មសិទ្ធិបញ្ញា និងការបង្កើតមជ្ឈមណ្ឌលនវានុវត្តន៍នៅវិទ្យាល័យ។

ជាលទ្ធផល អង្គប្រជុំបានឯកភាពលើចំណុចសំខាន់ចំនួនពីរ គឺ ការរៀបចំអនុស្សរណៈនៃការយោគយល់ រវាងក្រសួងអប់រំ យុវជន និងកីទ្បា និងសមាគមលើកកម្ពស់នវានុវត្តន៍កូរ៉េ (KIPA) និងការបង្កើតសមាសភាពគណៈកម្មាធិការអនុវត្ត និងវាយតម្លៃ((Steering Committee) នៃដំណើរការអនុវត្តគម្រោង ដោយមានការចូលរួមរួមគ្នារវាងក្រសួងអប់រំ យុវជន និងកីឡា នាយកដ្ឋានកម្មសិទ្ធិបញ្ញា និង KIPA។