ជាកិច្ចចាប់ផ្តើម ឯកឧត្តម សួន វិជ្ជា ប្រធានអង្គប្រជុំ បានថ្លែងមតិស្វាគមន៍ និងថ្លែងអំណរគុណយ៉ាងជ្រាលជ្រៅដល់សមាជិកសមាជិកានៃលេខាធិការដ្ឋាន គ.ក.ប. ទាំងអស់ដែលបានចំណាយពេលវេលាដ៏មានតម្លៃក្នុងការចូលរួមកិច្ចប្រជុំនេះ ដើម្បីពិនិត្យនិងផ្តល់ធាតុចូលបន្ថែមលើសេចក្តីព្រាងរបាយការណ៍ស្តីពីលទ្ធផលការងារប្រចាំឆ្នាំ២០១៩-២០២០ និងផែនការងារប្រចាំឆ្នាំ២០២១ របស់ គ.ក.ប. និងពិភាក្សាលើផែនការការងារកម្មសិទ្ធិបញ្ញាឆ្នាំ២០២១-២០២៣ និងយុទ្ធសាស្រ្តកម្មសិទ្ធិបញ្ញាជាតិផងដែរ។ លើសពីនេះទៅទៀត អង្គប្រជុំក៏បានពិភាក្សាអំពីការកែសម្រួលអនុក្រឹត្យ លេខ១៤២អនក្រ.បក ចុះថ្ងៃទី១៨ ខែកញ្ញា ឆ្នាំ២០០៨ ស្តីពីការបង្កើតគណៈកម្មាធិការជាតិគ្រប់គ្រងកម្មសិទ្ធិបញ្ញា រួមទាំងពិនិត្យកែសម្រួលសមាសភាពគណៈកម្មាធិការជាតិគ្រប់គ្រងកម្មសិទ្ធិបញ្ញា និងសមាជិកលេខាធិការដ្ឋាន ឱ្យស្របតាមការវិវត្តជាក់ស្តែង។

ជាចុងបញ្ចប់ ឯកឧត្តមប្រធានអង្គប្រជុំ បានថ្លែងអំណរគុណយ៉ាងជ្រាលជ្រៅដល់ការចូលរួមយ៉ាងផុសផុលពីសមាជិក សមាជិកាទាំងអស់ ដែលធ្វើឱ្យអង្គប្រជុំប្រព្រឹត្តទៅដោយរលូន និងទទួលបានលទ្ធផលផ្លែផ្កាតាមការរំពឹងទុក។